"عاوزة القصاص من قتلة ابني أدهم"، بهذه العبارة بدأت رشا جمال، والدة المجني عليه أدهم سعد، 18 عامًا، الذي راح ضحية خمسة شباب غدرًا بـمدينة مغاغة بالمنيا، أقوالها للمستشار محمود السكران وكيل نيابة مغاغة بسكرتارية تحقيق وليد عبد الجواد، مشيرةً إلى أن إبنها دفع حياته ثمنًا لشهامته، حينما كان برفقة صديقه بشارع الكنيسة التابع لدائرة المركز.

والدة شهيد الشهامة للنيابة: ابني طلع يتفسح يوم العيد رجع جثة والمتهمون تركوه ينزف في الشارع

وقالت الأم وهي تبكي: "ابني كان لسه طالع للدنيا، وكان متكفل بيً أنا وإخواته، وفي يوم عيد الأضحى طلب مني الخروج مع صديقه للفسحة، إلا إن الجناة أفسدوا حياتنا، والنتيجة إن ابني رجع جثة في يوم عيد".

 الأم قالت إن ابنها "أدهم"، لما نزل يتفسح، اتفاجئ بواحد صاحبه بيتخانق مع خمسة شباب، ولما حاول يتدخل لفض الخناقة قالهم "معلش يا شباب النهاردة عيد، وكل سنة وانتو طيبين، فرد عليه المتهم محمد قائلًا: "هو مفيش غيرك انت اللي راجل، فرد عليه ابني قاله، معلش كل سنة وانتوا طيبين، وخد صاحبه ومشيوا، لكن الموضوع ما وقفش لحد كدة!".

بتضيف والدة أدهم بتقول: "ابني ادهم علشان كان شهم، رفض يسيب صاحبه، أخده ومشيوا بدراجة نارية كانوا راكبينها، لكن اتفاجئ بالمتهمين ماشيين وراهم، وفي شارع الكنيسة وقفوهم ونزلوا صاحبه اللي كان راكب وراه بالعافية، ولما حاول "أدهم" يمنعهم، قام المتهم الثاني بإعطاء سكينة للمتهم الأول وطعن "أدهم" 8 طعنات في القلب والصدر وسابوه ينزف في الشارع وهربوا.

الأم قالت: "ابني وقع قتيل ف وقتها، وللأسف ملقاش حد ينقذه، بعدما ما المتهمين سابوه ودمه ساح في الشارع، وجريوا ورا صاحبه، وفي الحالة دي كان أمر الله كان نفذ، أنا عاوزة حق إبني من اللي قتلوه بدم بارد.

أم أدهم قالت لـوكيل النيابة محمود السكران، أنا مطلقة من 14 سنة، وأدهم بيكافح علينا وعلى إخواته، ومن يوم ما وقعت الجريمة، بتتمارس علينا ضغوط كبيرة من أهالي المتهمين، لأننا من عيلة فقيرة، لكن المتهمين من عائلات كبيرة ومعاهم سلطة ونفوذ، وخايفة حق إبني يضيع.

وبإحالة القضية لـمحكمة جنايات شمال المنيا برئاسة المستشار محمد عبد الحميد قطب، وقف محامي المجني عليه وليد عبد الحميد طالبًا القصاص من الجناة، وتوقيع أقصى عقوبة على المتهمين، لتحكم المحكمة بمعاقبة الاول والثاني والثالث بالسجن المشدد 15 عاما، وعشر سنوات الرابع وبراءة الخامس الذي اقتصر دوره على مجرد رفع الدراجة النارية من الشارع وقت الجريمة.