كشف المصور عوني البطل عن تفاصيل جلسة تصوير زفاف نفذها لعروسين في شارع طرح البحر ببورسعيد، معتمدًا على لوني الأبيض والأسود وأسلوب "الزمن الجميل"، في محاولة لإعادة أجواء الأربعينيات وسط تفاعل كبير من الأهالي.

قال "عوني" في تصريحات لـ "علام دوت كوم": "السيشن اتصور في شارع طرح البحر وبالأخص فندق بورسعيد. فكرة السيشن جت مني أولًا، إضافة إن العرسان كانوا حابين يدخلوا في أجواء الأبيض وأسود ويكون السيشن عفوي جدًا ".

أضاف: "من البداية كان عندي إحساس دايمًا إن كان نفسي أكون مصور في الزمن الجميل. فجاتلي الفكرة ونفذتها وحضرت كل التفاصيل مع التيم والعريس والعروسة، وكانت الفرحة في وسط أجواء الشارع البورسعيدي جميلة وكنت مبسوط بآراء الشارع وشاركونا الفرحة واليوم".

أشار إلى أنه كان قلقًا من ردود الأفعال في البداية، قائلًا: "كنت خايف من رد الفعل والمضايقات قبل ما أبدأ، لكن كانت كل التسهيلات موجودة سواء أمن الفندق في مساعدتنا وردود فعل الناس لغوا أي توتر نهائي، بل بالعكس الفرحة كانت أحلى".

تابع "عوني": "حابب أقول إن المصور الشاطر يقدر يضيف فكرة في يومه ممكن متستغرقش دقايق برا تفاصيل اليوم الأساسي يسعد بيها العرسان ويوصل للمتابعين ويحسسهم بمعنى الفكرة والمعايشة مع الصور".

اختتم: "العرسان مبسوطين جدًا والفيدباك جميلة أوي ورأيهم فرحني، وأكيد النتيجة مرضية بالنسبة إنها أول مرة بس لابد من تطويرها في الأفكار القادمة".