تحدث المؤلف عمرو محمود ياسين عن الهزة الأرضية التي شعر بها عدد من المواطنين فجر اليوم، موضحًا سبب تلقي هواتف الأندرويد إشعارات تحذيرية حول حدوث زلزال عكس "الآيفون".

كتب "ياسين" عبر حسابه الرسمي على موقع التواصل الاجتماعي "فيس بوك": "أولًا حمد الله على سلامة الجميع، الحمد لله لحد دلوقتي مفيش أي أخبار سيئة وإن شاء الله تكون عدت على خير".

تابع: "محدش يقلق من التوابع لأنها بتكون أقل حدة من الزلزال الرئيسي..

ونخلي بالنا في بوستات لانهيارات لمباني معمولة Ai، فمنشاركش الكلام ده ونتأكد قبل الشير".

أشار: "أما التنبيه اللي وصل لناس وناس، لا فالمجد للأندرويد ولا عزاء لعبيد التفاحة اللي ماسكين آيفون.. تليفونك الآيفون مش بيقولك اللي بتتصل بيه مع ويتنج ولا لا.. مستني منه يقولك خلي بالك في زلزال؟ بس مش مهم، المهم إن في تفاحة في ضهر الموبايل".

أضاف: "النقطة الأهم بقى، هو الأندرويد مش بيتنبأ بالزلزال قبل حدوثه، هو الزلزال بيكون بدأ بالفعل قرب مركزه لكن أندرويد بيحاول تحذير الناس البعيدين قبل ما توصل لهم الهزة القوية".

أكمل: "طيب الحكاية دي بتحصل إزاي؟ الفكرة بسيطة جدًا، معظم موبايلات أندرويد فيها حساس حركة اسمه (Accelerometer)، لو في مجموعة كبيرة من الموبايلات في منطقة واحدة رصدت اهتزاز مشابه بتيجي باعته إشارات لسيرفرات جوجل مع الموقع التقريبي، طبعًا جوجل مش بيعتمد على موبايل واحد لكن بيجمع بيانات عدد كبير من الموبايلات في المنطقة ويحللها عشان يعرف ده زلزال فعلا ولا إيه، وفين وإزاي ابتدى وإيه قوته تقريبًا".

أوضح: "الاعتماد بيبقى على أجهزة كثيرة عشان ميبقاش الموضوع مجرد حادث عارض لأجهزة وقعت مثلًا، وبالطريقة دي بيحصل الموضوع بسرعه جدًا وبيتبعت التحذير، وده أحيانًا بيكون مفيد وبيخليك تاخد حذرك.. وربنا يسترها علينا جميعًا ويحفظ مصر".